DAIGDIG Mga Rehiyon ng Daigdig Ang kontinente ay ang pinakamalaking uri ng anyong lupa. May mga kontinente na magkakadikit, at mayroon ding napalilibutan ng mga anyong tubig. Ayon kay Alfred Wegener, isang siyentipikong Aleman, ang kalupaan ng daigdig ay isang malaking kontinente lamang noong unang panahon. Ang malaking kontinenteng ito o supercontinent ay tinatawag na pangaea. Dahil sa paggalaw ng mga tectonic plates, naghiwa- hiwalay ang mga ito at saka nabuo ang pitong kontinente sa kasalukuyang panahon. Ang tawag sa teoryang ito na isinulong ni Wegener ay continental drift theory. ANG PITONG KONTINENTE AY ANG SUMUSUNOD: ● Asya ● Aprika ● Hilagang Amerika ● Timog Amerika ● Antarktika ● Europa ● Australia at Oceania ASYA Ang Asya ay ang pinakamalaking kontinente sa daigdig. Ito ay napalilibutan ng Karagatang Pasipiko sa silangan, Karagatang Indian sa timog, Karagatang Artiko sa hilaga, at Europa sa dakong kanluran. Sa katunayan, magkarugtong ang ilang bahagi ng Europa at Asya. Dahil dito, mayroong ilang siyentipiko na nagsasabi na dapat tawagin na lamang itong kontinente ng Eurasia. Ang Asya rin ang kontinenteng may pinakamalaking populasyon sa daigdig. Mahigit-kumulang 4.5 bilyon ang kasalukuyang populasyon ng Asya. Ang dalawang bansang may pinakamalaking populasyon sa mundo ay matatagpuan sa Asya—ang Tsina at India. Magkakaiba ang wika, relihiyon, at paniniwala ng populasyon sa Asya. Nabibilang ang Pilipinas sa mga bansa sa Asya na may sariling wika at paniniwala. Sa Asya matatagpuan ang ilan sa mga hiwaga ng ating daigdig. Matatagpuan sa Asya ang Bundok Everest, ang pinakamataas na punto sa buong mundo. Matatagpuan din sa rehiyon ang pinakamababang punto sa buong mundo, ang Dead Sea. Makikita rin sa Asya ang ilang mga natatanging gawa ng tao. Ang Great Wall sa Tsina, ang Angkor Wat sa Cambodia, ang Taj Mahal sa India, at ang Borobudur sa Indonesia ay ilan lamang sa mga halimbawa ng mga likhang ito. APRIKA
Ang Aprika ang pangalawa sa pinakamalaking
kontinente sa mundo dahil sa laki ng kalupaan at populasyon nito. Mahigit isang bilyon ang mga taong naninirahan dito. Ang Aprika ay napalilibutan ng Mediterranean Sea sa hilaga, ng Red Sea at Karagatang Indian sa silangan, at ng Karagatang Atlantiko sa kanluran. Ang hilagang bahagi ng Aprika ay binubuo ng disyerto. Matatagpuan dito ang pinakamalaking mainit na disyerto sa daigdig, ang Sahara. Samantala, ang ibang bahagi ng kontinente ay binubuo ng savanna at mga tropikal na gubat kung saan matatagpuan ang mga hayop katulad ng mga leon, elepante, usa, kamelyo, at mga giraffe. Matatagpuan din ang pinakamahabang ilog sa buong mundo sa Aprika, ang Ilog Nile. Ang hilagang bahagi ng Aprika ay binubuo ng disyerto. Matatagpuan dito ang pinakamalaking mainit na disyerto sa daigdig, ang Sahara. Samantala, ang ibang bahagi ng kontinente ay binubuo ng savanna at mga tropikal na gubat kung saan matatagpuan ang mga hayop katulad ng mga leon, elepante, usa, kamelyo, at mga giraffe. Matatagpuan din ang pinakamahabang ilog sa buong mundo sa Aprika, ang Ilog Nile. HILAGANG AMERIKA
Ang Hilagang Amerika ay ang pangatlong
pinakamalaking kontinente. Ito ay matatagpuan sa dakong hilagang-kanluran ng daigdig. Napaliligiran ito ng Karagatang Arktiko sa hilaga, ng Karagatang Atlantiko sa silangan, at ng Karagatang Pasipiko sa kanluran. Matatagpuan ang lahat ng klase ng klima sa Hilagang Amerika, tulad ng polar o malamig na klima sa hilaga, disyerto sa timog ng Estados Unidos, at tropikal na klima sa sa mga bansa sa dako na malapit sa Timog Amerika.
Ang Hilagang Amerika ay may populasyon na mahigit
579 milyon sa kasalukuyan. Marami sa mga naninirahan dito ay gumagamit ng wikang Ingles, Espanyol, at Pranses. Ang siyudad na may pinakamalaking populasyon ay ang Lungsod ng Mexico. TIMOG AMERIKA Ang Timog Amerika ay pinalilibutan ng Hilagang Amerika sa itaas, ng Karagatang Pasipiko sa kanluran, at ng Karagatang Atlantiko sa silangan. Maraming uri ng hayop at halaman ang matatagpuan sa mga gubat ng Timog Amerika. Mahigit 40,000 uri ng halaman, 3,000 uri ng isda, 2,000 uri ng ibon, mammal, at reptilia ang naitala sa Timog Amerika. Marami sa mga ito ay matatagpuan sa mga gubat ng Amazon. Bukod sa mga uri ng hayop, ang isa sa mga pinakamalaki at mahabang ilog sa mundo ay matatagpuan din dito—ang Ilog Amazon. Karamihan sa populasyon ng Timog Amerika ay gumagamit ng wikang Espanyol at Portuges dahil sa kasaysayan nito bilang kolonya ng Espanya at Portugal. EUROPA
Ang Europa ay ang karatig na kontinente ng
Asya. Nahihiwalay ang dalawang kontinente ng Bulubunduking Ural, Dagat Caspian, at ng Bulubunduking Caucasus. Pinalilibutan ito ng Karagatang Arktiko sa hilaga, ng Karagatang Atlantiko sa kanluran, at ng Dagat Mediterranean sa timog. Ang malaking bahagi ng Europa ay may temperate na klima. Ang kanlurang bahagi ng Europa ay madalas nakararanas ng pag-ulan, samantalang ang silangang bahagi nito ay hindi gaanong nakararanas ng ulan. Sumusunod ang Europa sa Asya at Aprika sa laki ng populasyon. Ito ay may populasyon na mahigit 730 milyon. Ang Europa ay kilala sa kaniyang kultura at arkitektura. Ang ilan sa mga gawang tao na kilala sa buong daigdig ay ang Colosseum, ang Tore ng Pisa, ang Parthenon sa Gresya, ang Eiffel Tower, at mga kastilyo sa iba't ibang bahagi ng Europa AUSTRALIA AT OCEANIA
Ang Australia at Oceania ang pinakamaliit na
kontinente sa daigdig. Pinaniniwalaan na ang Australia ay dating bahagi ng Antartika bago ito gumalaw pahilaga. Sa kasalukuyan, ito ay napaliligiran ng Karagatang Indian at ng Karagatang Pasipiko. Ang malaking bahagi ng Australia ay nasa loob ng kontinente na tinatawag na outback. Ito ay malayo sa mga mataong lugar. Ang outback ay kadalasang tuyot at nagtataglay ng kaunting anyong tubig. Ang hilagang bahagi ng Australia ay naaapektuhan ng Karagatang Indian na nagdadala ng pag-ulan. Maraming bukod- tanging mammal ang matatagpuan sa Australia, katulad ng kangaroo, koala, echidna, platypus, at wombat. ANTARKTIKA Ang Antarktika ang pinakamalamig na lugar sa buong daigdig. Ito rin ang may pinakamalaking disyerto sa daigdig. Ang Antartika ay nakararanas din ng napakalakas na hangin. Dahil sa klima ng Antartika, walang permanenteng populasyon ang kontinente. Ang mga naninirahan lamang dito ay ang mga siyentipiko mula sa iba't ibang bansang nag-aaral at nagsasaliksik tungkol sa buhay, topograpiya, at klima sa kontinenteng ito. Kahit na malamig ang klima ng Antartika, maraming uri ng hayop ang matatagpuan dito, katulad ng isda, penguin, seal, sea lion, at mga balyena. MGA KLIMA SA DAIGDIG
Ang klima ay pangmatagalang kondisyon ng
panahon sa isang lugar. Ang panahon naman ay ang pabago-bagong kondisyon ng atmosphere sa loob ng maikling panahon. Ang iba't ibang bahagi ng daigdig ay nakararanas ng magkakaibang klima. Ang pinakaginagamit na sistema ng pag-uuri ng klima ay ginawa ni Wladimir Koppen, isang heograpo at meteorologist. Ayon kay Koppen, ang uri ng halaman na matatagpuan sa isang lugar ay batay sa klima nito. Sa sistema ni Koppen, may limang uri ng klima: tropikal, tuyo, katamtaman, kontinental, at polar. TROPIKAL (TROPICAL CLIMATE)
Ang mga tropikal na klima ay nakikita sa
kahabaan ng bahagi ng ekwador. Mainit at madalas nakararanas ng ulan ang bahaging ito. Ang temperatura ay sumasaklaw ng mula 18 oC hanggang 23 oC at maaaring umabot ng mahigit 30 oC hanggang 33 oC. May tatlong uri ng tropikal na klima: tropical wet o rainforest, tropical monsoon, at tropical wet and dry o tropical savanna. Ilang halimbawa ng mga bansa na may tropikal na klima ay Pilipinas at Ecuador. TUYO (DRY)
Hindi gaanong umuulan sa mga lugar na may
tuyong klima. May dalawang uri ng tuyong klima: arid at semi-arid. Sa mga lugar na may arid na klima, nakararanas nang mahigit sampu hanggang 30 sentimetro ng ulan kada taon. Ang pinakamainit na mga lugar sa mundo ay matatagpuan sa mga arid na bahagi, at umaabot sa mahigit 58 oC ang temperatura sa mga lugar na ito. Marami sa mga ito ay mga disyerto. Sa mga lugar na mayroong semi-arid na klima, nakatatanggap ng ulan na maaaring sumuporta sa pagtubo ng damo o ilang maliliit na halaman. Halimbawa ng mga bansang may tuyo na klima ay Afghanistan at Azerbaijan. KATAMTAMAN (MILD OR TEMPERATE MARINE) Ang mga rehiyong may klimang katamtaman ay hindi nakararanas ng napakainit at napakalamig na temperatura. Katamtaman din ang nararanasan nilang presipitasyon. Mayroong tatlong uri ng katamtamang klima: Mediterranean, humid subtropical, at marine. Ang temperatura sa mga bahaging ito ay maaaring sumaklaw mula -3 oC hanggang 18 oC sa mga malalamig na buwan at mula 10 oC pataas sa maiinit na buwan. Halimbawa sa mga bansang may ganitong uri ng klima ay Italya. KONTINENTAL (TEMPERATE CONTINENTAL) Ang mga lugar na may kontinental na klima ay nagsisilbing transisyon sa pagitan ng katamtamang klima at polar na klima. Ang karaniwang temperatura sa mga lugar na ito ay 10 oC at pataas sa mga maiinit na buwan, at -3 oC pababa sa mga malalamig na buwan. Mas malamig din ang taglamig (winter) dito sa mga bahagi na ito kumpara sa mga lugar na may katamtamang klima. Mayroong tatlong uri ng kontinental na klima: warm summer, cool summer, at sub-arctic. Ang lahat ng mga klimang ito ay nahahanap lamang sa hilagang bahagi ng mundo, na napapaloob sa mga kontinente. Halimbawa sa mga bansang mayroon kontinental na klima ay Ukraine. POLAR Ang polar na klima ay matatagpuan sa loob ng Kabilugang Arktiko sa hilagang bahagi ng mundo at sa Kabilugang Antartiko sa timog na bahagi ng mundo. Ang polar na klima ay ang pinakamalamig sa lahat, at kabilang dito ang ice cap at tundra. Ang karaniwang temperature ng polar na klima ay 10 oC pababa. Halimbawa ng bansa na may polar na klima ay ilang bahagi ng timog Kyrgyzstan at Russia.